Hunarmandchilik mahsulotlarining sifati va eksport salohiyatini oshirish, ularni milliy va xalqaro standartlari va talablari asosida tayyorlash, hunarmandchilik mahsulotlarini qadoqlash, brendlash, jahon bozorida haridorgir bo‘lishiga erishish bugungi kunning dolzarb mavzusi. Bu borada “Hunarmand” uyushmasida tizimli ishlar boshlandi.
Uyushma raisi R.Mirzaaxmedov bugun Toshkent shahridagi mashhur «Bibi xanum» brendi asoschisi Muhayyo Aliyeva bilan uchrashdi.
Uchrashuvda Uyushma rahbari hunarmandchilik mahsulotlarini patentlash – bu milliy va an’anaviy dizayn, texnologiya, bezak va ishlab chiqarish uslublarini huquqiy muhofaza qilish jarayoni bo‘lib, u hunarmandlarga o‘z ixtirolari va noyob mahsulotlarini himoya qilish imkonini berishi haqida gapirdi. Bunday patentlash jarayoni orqali hunarmandlar o‘z mahsulotlarining noyobligi va intellektual mulkini himoya qilib, ularning noqonuniy nusxalanishiga yoki soxtalashtirilishiga yo‘l qo‘ymaydilar. Shuningdek, patentlash hunarmandchilik mahsulotlarining bozordagi raqobatbardoshligini oshirib, ularga xalqaro va mahalliy bozorlarda eksklyuzivlik beradi.
Shundan so‘ng “Hunarmand” uyushmasi raisi R.Mirzaaxmedov Toshkent shahridagi Navro‘z bog‘ida hunarmandlar bilan uchrashdi.
Uchrashuv davomida Hunarmand uyushmasi tomonidan hunarmandchilik va xalq amaliy san’ati mahsulotlarini brendlashtirish, raqobatbardosh mahsulotlarni yaratish, jahon bozoriga olib chiqish bo‘yicha amalga oshirilayotgan ishlar xususida so‘z yuritdi.
